It’s no you, it’s me: or, sorry Gaelic, but Scots still haes issues tae wirk throu
Syne we’r aw on the subject nou o whit mis-uisses o the leid a Scots spikker is or isnae alloued tae feel affrontit bi — whither it’s sneistie Disney-Pixar memes or the Diet Scots on American telly programmes — can ah lat ye in on wan o ma ain wee wirry-carles? Ye’ll hiv heard it yersel, nae dout; yon thocht-terminatin cliché that signifies maximum woke wi minimum ettlin, thirls sympathy for the cause wi sweirtness tae hear anither wird aboot it, an it gangs like this:
“Oh, one of my friends is a Gaelic speaker, and he…”
Weel… ay. Yin o the tapmaist kenmerks o oor mansplainy times is that there’s naither need nor prerogative tae haud tae the maiter at haund, especially gin ye ken naething aboot it an hiv nae interest in learnin. We mebbes dinnae aw ken awfu muckle aboot the Scots leid1, but we’v aw got a freend or twa that spiks Gaelic, or is ettlin tae — an sae maist o us hiv got a hale wheen o richt-on opinions on the subject. Hou important the leid is, hou necessar that we aw fecht tae preserve it an pass it ontae oor bairnfowk. Mun, juist staundin here sayin aw this maks ye feel like Martin Luther King oot on the steps o the Capitol…
We bide in an era o uneasy alliances; solidarities which, houiver hertenin, shield us fae the fact that, even whan we’r in the same boat as ithers, some o us ar huddled doun in steerage. The human spark micht be sib in ilka kist, but the strauchles we aw face ar different. The places we’r stairtin fae, the airtins we’r heidit — it’s fause equivalences in these that aft haud us aw back. An the parallels we insist on drawin atween oor twa leids ar as unhelpfu tae Gaelic as they ar ootricht dangerous tae Scots.
Mony Scots spikkers ar gey keen on mairyin thegither the Scots cause wi the Gaelic. There’s a sense there that the haird-focht forders o the Gaels can somehou be cairit ower tae oorsels, that we can jouk the hale queue bi jynin them at the front. Or mebbes, at the verra least, that thirlin the twa leids thegither legitimises oor ain strauchle, anoints us wi a wee skoosh o second-haund coolness — opens up doors tae us that we cannae manage for oorsels. It’s a bonnie wee narrative; but like mony sic stories, it’s leadin us places we shouldnae want tae gang.
Nou, mebbes ye think ah’m juist jealous o Gaelic. Weel, duh. Coorse ah’m jealous o Gaelic. Ah’m jealous o the genuine guid-will the language is able tae generate; jealous o the organisations that uphaud it; jealous o the road-signs an the wabsteids an the TV programmes that cement its place in oor cultur. It’s no a feelin ah’m prood o, an ah dinnae propone tae dae onything aboot it. It isnae, as fowk ar ayeweys ettlin tae mak it, a maiter o settin yin leid agin the ither. BUT. Whit ah’m sayin is — tae compare whaur we ar wi Scots tae whaur we ar wi Gaelic is no a proposition tae mak onybody’s hert sing oot.
Here’s the thing. Onybody readin this kens awready the muckle disparity atween government fundin o Gaelic an government fundin o Scots, niver mind the respective political wechts the twa leids bring tae beir at Holyrood2. Sae it’s plain as parritch that Scots spikkers simply cannae ettle at or howp tae emulate the structurs Gaelic haes biggit up… No on the siller we’v got. Tae even tak a shottie at it can anely mean failure an self-reproach. Ony ither wey o leukin at it is juist magical thinkin o the sort that susteens hale industries o the evangelical variety — if ye’r no daein sae weel, no able tae staund on yer ain twa feet, it cannae be for want o this thing or that; it maun juist be acause ye dinnae BELIEVE. Scots spikkers o the warld! Keek throu the cracks o yer dusty Venetians at the perjink hoose across the wey, an ask yersel — hou can oor faimily no juist be NORMAL like awbody else’s?!
Acause juist aboot the anely thing awbody laubourin doun the Scots leid mines haes in common is oor shared unnerstaundin that this is no a happy coalition. The in-fechts, the back-gates, an the general huggery-muggery ar aw pairt o an ongaun storyline that wad dae credit tae naebody, ’cept mebbe Vince McMahon… But the hale thing is no acause Scots spikkers ar in ony wey waur (or in ony wey better) than awbody else; it’s maistly juist acause o the age-auld problem that haes aye pit the puir at each ither’s thrapples. The knives ar that shairp, as Henry Kissinger wance said, acause the pie is that tottie. An yet, if the Gordian fankle that presents itsel in tryin tae line up the interests o scrievers, spikkers, linguists an academics is ayont unpickin bi ony normal means, a wee bit siller wad cut the hale writhin mess free o itsel in wan clean chap…
Ay, ah ken, ah ken. Gaelic got its hoose in order — sae hou’s aboot Scots daes the same? Whit maks us ony different? Weel, that’s a haird contraption tae figur a wey oot o… An ah jalouse ah can see their pynt. Unless an until Scots gets oor deuks in a line, mebbe we shouldnae get wan mair penny than it taks tae keep body an saul thegither… Hell! Mebbes we shouldnae even get that…
Weel, mebbes ay… But mebbes naw. Nae dout there ar political realities tae be negotiatit here, an tae insist on immediate parity atween fundin for Scots an fundin for Gaelic shaws an airy disregaird for common sense that’s normally reserved for fowk wha run their ain airt gaileries… An yet tae learn a man tae fish for himsel, ye at least hiv tae gie him the catter for a net. The current level o fundin for Scots — £270k per year — isnae sae muckle a bequest as a puinishment, an as per maist sic Biblical notions, puinishment is a thing that’s as like tae faw on bairns o the guilty as on the guilty theirsels… The upshot o which is that the stairvation rations Scots is dwynin awa on dinnae juist mean that me an you get oor comeuppance for no bein able tae share a room wi’oot argyin hou tae spell ‘room’; they mean that oor bairns dae an aw. A bairn fae Govanhill micht, eventually, growe intae their brither’s auld blazer. A wean fae Easterhoose can howp, wan day, tae find room at a student union table. But nae maiter whit happens, they’ll niver find a leid that fits them the wey their forgotten Scots wance did.
This isnae a rallyin cry for Scots spikkers tae come thegither. If sic a thing is necessar at aw — an mebbes it is — it’s needin tae come fae better fowk than ah’v makkit o masel. But whitiver the meetin grund that we micht yet win tae, we’ll get there aw the suiner gin we tak tent o whaur we’r stairtin fae. Ay, ah’v a Gaelic pal an aw — a gey braw chiel, onybody wad want tae be his pal. But if the leids me an him baith spik ar fellae traivelers, it’s no on roads that ar onything much alike. No juist yet. But wan day, mebbes, wan day.
Glossar
airtins directions; back-gates mischievous behaviour; catter money, cash; ettlin effort (n), trying (v); fankle tangle; forders progress; huggery-muggery clandestine conduct; jalouse suppose; jouk avoid; kenmerks distinguishing characteristics; kist chest; perjink trim, neat, well-turned-out; sib closely akin, the same; sneistie supercilious; strauchles struggles; sweirtness reluctance; thirls joins, links; uphaud support; wirry-carle bugbear
Repones
5 Repones
A real belter. It’s time fir a fecht tae get mair siller for Scots, wi aabdy, the spikkers, scrievers, academics, publishers, aabdy, gangin thegither, at least for a wee bitty.
I’d forgotten how important it wis tae ‘mak the pie a bittie bigger’, but I mind find nou.
Cheers Tam
Cheers mun! An ye’re richt, as lang as fundin for Scots is a couple o bawbees skirlt in the street, the leid is aye gaun tae be fechtin ower itsel doon in the cunyie.
I love to learn the language
I think this is an excellent article. Sorry not to respond in Scots, but I don’t think in it for this kind of thing. What about strategic thinking? That doesn’t need to cost anything. Do you think activists have a shared idea of strategic priorities, and a plan of what needs to be done? So instead of trying to do loads of things, like Gaelic does (music, theatre, TV, film, language learning, running GM schools, research, etc etc) could it be possible to concentrate on one thing e.g. recording live Scots (or something else which will have a big impact)?
You’re absolutely right, I think. We can’t do the same things on £270k that it costs Gaelic £25m to do. We need to pick one or two areas where we can make a good fist of it and crack on. The purported difficulty is getting enough people to agree on what those areas should be, given that virtually anything that anyone does in or with Scots runs contrary to someone else’s intuitions about what Scots is “for”.. But no doubt the Gaelic model had/has its internal detractors too, and if they were still able to put together a powerful, cohesive lobby out of 40,000 speakers, surely 1.6m Scots speakers can do the same?
Sorry, ye canna repone tae this post ony mair.