Naewey tae bide

It’s impossible tae unnerstaund fit it feels like tae hae naewey tae bide. But, juist shut yer een; tak a míntie tae imaigine fou it maun feel tae nae hae a comfy sofa tae come hame an park yer bahookie on efter a lang, haurd day; nae telly tae watch daft programmes on whilst ye ham in tae yer warm maet keukit in a convenient kitchen ben the hous. Think fit it maun be like tae nae hae a cosy bed far ye can pit yer heid doun fan ye want naething mair than a decent kip.

Sadly, for a lairge nummer o Scots fowk, they dinna hae tae imaigine this scenario because it’s their reality. In 2016-17, there wis mair than 34,000 hameless applications made in Scotland. Aamaist the same amount o fowk fa mak up the population o Fawkirk or Stirlin. A hertbraken nummer.

Things div seem tae be gettin a wee bittie better, fouiver, compare’t tae 2005-6, fan this nummer reached ower 60,000. The raison for this could pairtially be that fowk seem tae be becomin mair conscious about the problem. Ah hiv certainly seen a chynge in attitudes taewart hameless fowk sin ah wis a young quinie.

Ae chiel fa, ah believe, haes haen a grand impact on motivatin mair fowk tae help the hameless in the North-East, an beyond, ower the past few ’ear, is Gordon Cruden. Back in the winter o 2015, the Brocher decidit tae embark on a thirty-day ‘Hungry for the Homeless’ challenge. This involved spendin a month bidin on the streets o Embra, Cardiff, Dublin, Belfast an London wi nae siller, maet, bed or shelter. Ower the duration o his challenge, Cruden shared the stories o mony o the fowk he met alang the wey, fa war left wi naewey but a cauld street tae caa hame, on social media. Mony a time he explain’t juist fou little it teuk for thaim tae end up on the streets, an it wis a harsh reminder tae aa fa read his posts juist hou guid ye’ve got it if ye hae a ruif abuin yer heid, an fou easily it could aa be taen awa fae ye.

The reaction tae these stories, whilk left ye fit tae greet, wis outstaundin. By the end o his thirty days on the streets, Cruden haed thousands o fowk follaein him on Facebook, an ah ken for a fact that mony fowk fae round about the North-East nou see thaim fa are bidin on the streets fae a different perspective. A braw example o fou juist ae person can mak a gigantic difference.

There wis also anither event haudit in the capital this ’ear, wi the intention o shinin some licht on fit life is like for the hameless. On the 9t o December 2017, mair than 8000 fowk slept roch on Princes Street Gairdens, raisin juist ower fower million pund tae help the hameless fowk o Scotland. Whilst this o course is a fantastic achievement, there haes been some críticism o the event, the name o whilk, ‘Sleep in the Park’, hints tae it bein a glorified muisic festival; an tae a point, that’s fit it wis. Nae dout that haein the likes o Liam Gallagher an Amy Macdonald performin tae those fa war able tae gie £100 or mair wis a great incentive tae raise funds, but ah canna help thinkin that this approach unnermine’t the hale issue o hamelessness tae an extent. Nae haein somewey tae bide is sae much mair uncouthie than haein a jolly tae the park wi yer chums tae watch warld-famous singers an be served bacon rolls by Rob Brydon.

The £100 minimum donation also left me feelin disherted about the hale shebang, as ah felt that fowk fa mebbe couldna afford tae help out by donatin as muckle, shouldna hae been left out. In fact, ah think it wad be a fantastic idea if they lat fowk fa are registered as hameless jyne in, sae that they could mingle an share their experiences wi fowk fa care about helpin thaim. There’s nae denyin that it’s a fantastic idea tae haud an event whilk raises sae much awaurness and siller for fowk ’itout a hame. Ah div believe, fouiver, that a haundfu o tweaks should be made, tae aither mak it mair realistic o the challenge o bidin on the streets, or mair inclusive aathegither.

Aatho the nummer o fowk ’ithout hames daes seem tae be drappin, an mair an mair fowk are daein their bittie tae help, the issue o hamelessness contínues tae exist in Scotland. Gordon Cruden, fa nou rins twa residential centres in the North-East for fowk fa are strugglin, is a role-model for onybody fa wants tae dae somethin tae help thaim fa dinna even hae a place tae caa hame.

O course ye dinna hae tae stairt wi a challenge as difficult as his ane tae mak a difference. But fan ye’re lyin cosy tucked up under the duvet the nicht, mebbe think tae yersel if ye can spare a pund or twa, or even a few mínties o yer time, tae mak somebody fa haes naething’s day.

Antonia UriAntonia Uri is a twinty-ane year auld Doric-spikkin student o Modren Furrin Leids at the University o Aiberdeen. She is currently the Alba Eiditor at The Gaudie, an a scriever for The National. Claik awa wi her on Twitter @teuchtertoni.

Social media thumbnail ímage: not everyone is taking in the historic sights by byronv2. Licence: CC BY-NC 2.0.

5 repones tae “Naewey tae bide”

  1. Why ‘whilk’ but ither wirds aw hae ‘f’ for ‘wh’ includin whaur that or ‘at wad be expectit for the relative pronoun?

    1. I dinna ken ower muckle anent North-East Scots specífically, but I jalouse it’s símilar til ither dialects o Scots, whaur while whilk an wha as relative pronouns haes aye been common in scrievin, that’s no the case in speak, whaur, as ye say, [’]at or that is uised for ordinar. Because o that, the ‘wh’ in whilk micht niver hae cam tae tak on the ‘f’ realisation kenspeckle in ither North-East wirds beginnin wi ‘wh’. I div tent that Kynoch’s A Doric Dictionary (1996) gies whilk as a relative pronoun.

      1. Oh deary me! Whilk gaed oot o uiss in ordinar speak at the fore-end o the twintiet century. Whan it wis actively uised in the North East, the initial consonant wad hae been ‘f’. Whit’s happent here, gaun by the readin, is that a body that for ordinar disna habitually speak Scots thaimsel haes liftit a wird frae the writins o ithers, that likely disna habitually speak Scots aither.

        1. Juist checkit my CSD2 an is daes gie ‘filk’ as a NE pronunciation, that I didna tent afore. Houiver, the’re naething wrang wi uisin wirds in scrievin ye wadna for ordinar uise in speak. I ken I div dae it, in baith Scots an English. Depends on whit kind o register ye’re ettlin at. The’re nae rule that says written language maun reflect speak 100% in aw contexts.

          1. Liftin wirds an uisin thaim is pairt o learnin an leeteracy. Houaniver, wi Scots its after juist a mixtur-maxtur o sindry dialect spellins an archaisms aw batter thegither in the haud an bind o Staundart English grammar an syntax. That’s naither fish nor foul.

Repone ablo

Your email address willna be set furth. Require’t kisties is merkit *